«Moodle»: berrikuspenen arteko aldeak

09:36, 20 Abendua 2007(e)ko berrikuspena

Moodle online moldeko ikastaroak sortzeko programa-multzoa da. Garabidean dagoen kode irekiko proiektua da eta giza konstruktibismoak gidatutako hezkuntza-egoerak bultzatu nahi ditu. Aurreko artikulu batean plataforma telematikoak izan genituen hizpide. Artikulu-sail honetan horietako baten ezaugarri nagusiak aztertuko ditugu: Moodle

Moodle (Modular Object-Oriented Dynamic Learning Environment delakoaren laburdura) Martin Dougiamas australiarrak sortuz zuen 2001ean eta harrez geroztik ikaragarrizko arrakasta eta zabalkundea izan du mundu osoko hezkuntza-erakundeen artean. Gaur egun, Moodle 70 hizkuntzatara itzulita dago (euskarara ere bai), eta 75.000 profesional baino gehiago ari dira elkarlanean plataforma hobetzen eta osatzen.

Moodle, izatez, Course Management System edo Ikastaroak Kudeatzeko Sistema da (CMS). Ardatza, beraz, ikastaroa da eta modularra izaki, tutoreak ikaragarrizko erraztasunez molda dezake bere irakasgaia online erako esparru bat erabiliz.

Ezaugarri teknikoak

Hona hemen sistemaren hainbat ezaugarri tekniko:

• Moodle Unix, Linux, Windows, Mac OS X, Netware eta PHP onartzen duten bestelako sistema eragileen gainean ejekutatzen da (Web ostalari gehienek onartzen dute).

• Moodle era modularrean dago diseinatuta. Hartara, erraztasun handia ematen du maila askotan hainbat eta hainbat funtzio gehitzeko (eta kentzeko).

• Moodle oso erraz eguneratzen da bertsio batetik hurrengora (eguneratzeko eta datu-baseak aldian-aldian konpontzeko barne-sistema du).

• Moodle-k datu-base bakarra erabiltzen du (beharrezkoa izanez gero, beste aplikazioekin konparti dezake).

• Moodle-k datu-baseen abstrazio osoa erabiltzen du, datu-baseen mota behinenak onartzen ditu.

• Enfasi handia jarri da plataforma osoaren ziurtasunean: formulario guztiak berrikusten dira, kokiak enkriptatzen dira, e.a.

• Testua idatzi beharreko eremu guztietan WYSIWYG erako HTML editorea erabiliz idatz daiteke (baliabideak, foroetako mezuak, egunkarietako sarrerak, e.a.)

Ezaugarri pedagogikoak

Irakaskuntzaren ikuspuntutik, berriz, ondoko ezaugarriak dira interesgarri:

• Moodle-k giza pedagogia konstruktibista eta soziala bultzatu nahi du (lankidetza, jarduerak, hausnarketa kritikoa, e.a.)
• Moodle egokia da online erako eskolak emateko, baina baita aurrez aurreko ikaskuntzaren osagarri gisa ere.

• Moodle-k teknologia erraz, arin, eraginkor eta bateragarrian egindako nabigatzaile-interfaza du.

• Ikastaro-zerrendak zerbitzarian dauden ikastaro guztien deskribapen laburra erakusten du, eta baita horietara bisitari gisa sartzeko aukera ere.

• Ikastaroak kategoriaka sailka daitezke eta horien bilaketarako aukera ere ematen du (Moodle gune batek milaka ikastaro izan ditzake)

Diseinu modularra

Moodle-ren ezaugarri nagusietako bat bere modularitatea da: plataformaren tresna eta atal guztiak funtzionaliatate independentea dakarten modulu gisa daude diseinatuta.

Modularitateari esker, tutoreak edo ikastaro-diseinagileak oso modu erraz eta berehalakoan sor dezakete beren beharrei erantzungo dien ikastaroa, aukeran dituzten tresnetatik interesgarrien edo errentagarrien iritzitakoak aukeratuz eta direlako arrazoiengatik behar edo komeni ez zaizkienak alde batera utziz. Ondorioa argia da: Moodle-k ikaragarrizko ahalmena du hezkuntza-testuinguru ezberdinetan sor daitezkeen beharrizanei erantzuteko.

Hona hemen Moodle-ren aukera nagusiak:

Komunikazioa bultzateko tresnak

• Norberaren profila: Informazio pertsonala biltzea eta besteei erakustea du helburu.Norberaren argazkia, deskribapen laburra, harremanetan jartzeko datuak... ager daitezke hemen.

• Foroak: Foro-mota ezberdinak erabil ditzakegu segun eta zein helburu didaktiko dugun.

• Mezuak: Berehalako mezularitzarako sistema da. Oso komunikazio-truke azkarrak mesedetzen ditu.

• Egunkaria: Helburua ikaslearen gogoetatarako eta hausnarketarako gaitasuna sustatzea da. Tutoreak galderak proposatze ditu eta ikasle bakoitzak bere erantzunak editatu eta alda ditzake denborak aurrera egin ahala.

• Inkesta: Tutoreak ikasleen artean kontsulta arinak egitea du helburu. Galdera bat eta hainbat erantzun posible zehaztuta, ikasleek horien artean aukera egin behar dute.

• Txata: Interneten bidez denbora errealean (sinkronoa) partaideen arteko elkarrizketa izatea ahalbidetzen du. Baliagarria izan daiteke gainerako partaideak eta eztabaidagaia hobeto ezagutzeko.

Edukiak lantzeko tresnak

• Web-orria: Ikastaroan testuak gaineratzea du helburu. Tutoreak baino ezin ditu orri horiek gehitu. Online idatz dezake edo beste fitxategi batetik testua kopiatu eta bertan itsatsi.

• Fitxategiak: Ikastaroan era guztietako fitxategiak igo daitezke (doc modukoak, datu-baseak, kalkulu-orriak, bideoak, MP3-ak...). Tutoreak lehendik euskarri horietan zituen edukiak balia ditzake ikastaroan gaineratuz. Tutoreak baino ezin ditu fitxategiak ikastarora igo.

• Glosategia: Honi esker ikastaro bateko partaideek definizo-zerrenda bat sortu eta eguneratu ahal dute, hiztegi baten moduan. Bilaketa- modu ezberdinak daude.Tutoreak aukeran du ikasleei sarrera berriak egiten uztea, edo daudenei iruzkinak egiteko modua eskaintzea.

• Liburua: dokumentazioa aurkeztea du helburu eta kapitulutan antolatutako orriak sortzeko modua eskaintzen du.

• Ikasgaia: ikasgaiak edukiak ematen ditu era malguan. Orri-segida bat da. Bakoitzaren amaieran galdera bat eta hainbat erantzun izan ohi dira. Ikasleak egindako aukeraren arabera, hurrengo orrira igaroko da edo aurreko batera. Tutoreak baino ezin du diseinatu.

• Wikia: idazketa kolektiboa ahalbidetzen du modulu honek.

• Estekak: Ikastarotik bertatik bestelako web guneetara joateko lotura zuzenak dira. Tutoreak baino ezin ditu horiek gehitu.

Ebaluazioa egiteko tresnak

• Kalifikazioak: Tutoreak aukeran du jarduerak kalifikatzea. (numerikoki, eskala kualitatiboren bat erabiliz...) Modulu honetan horietako bakoitzean lorturiko emaitza kontsultatzeko modua dago.Tutoreak ikasle guztien kalifikazioak ditu eskura, eta ikasle bakoitzak bereak.

• Jarduera-txostena: Ikastaroan zehar izandako jarduera nolakoa eta zenbatekoa izan den esaten digu du bloke honek. Tutoreak ikasle guztien txostenak ditu eskura, eta ikasle bakoitzak berea.

• Zeregina: Modulu honi esker tutoreak ikasleei lanen bat agintzeko modua du. Gainera, erraz kalifika ditzake eta nahi izanez gero, feedbacka eskaini.

• Galdetegia: Modulu honek hainbat moldetako galdekizunak eta azterketak diseinatzea eta planteatzea ahalbidetzen dio tutoreari.

• Hausnarketa: Modulu hau on-line moldeko ikas-prozesuak ebaluatzeko eta sustatzeko inkesta batzuek osatzen dute. Denek dute pedagogia konstruktibistaren aldeko ikuspegia.

Estekak

Web gune nagusiak:

• Moodle-ren gune ofiziala

• Moodle Euskaraz komunitatea

Dokumentazio-guneak

• Moodle Doc-ak Euskaraz

• Moodle-ren ezaugarri nagusiak

Esku-liburuak

• Moodle-rako esku-liburua euskaraz]