Euskara eta ikas-estiloak

Argitara eman berri du Iñaki Pikabea irakasleak Euskara eta ikas-estiloak izeneko liburua. Pikabea EHU-UPVko Filosofia eta Hezkuntza Zientzien Fakultateko irakaslea da eta aspaldi hasi zen euskara ikastean ikasleek erabiltzen dituzten estrategiez eta ikas-estiloez kezkatzen. Ildo horretan, hainbat eta hainbat lan interesgarri burutu ditu.

Ikus, adibidez, web gune honetan bertan argitara emandako ?Ikas-estiloak? izeneko artikulua edo Irakasleon Aldizkariko 14. alean azaldu zen ?Ikas-estiloen eta ikas-estrategien garrantzia euskara-ikasle helduengan? izenekoa.

Orain aurkeztu nahi dugun liburua Erein argitaletxeak argitaratu du, eta helduekin diharduten euskara-irakasleei zuzenduta dago. Planteamendu jakin baten inguruan ariketa-eredu batzuk proposatzea da liburuaren egitekoa. Planteamendu honen abiapuntua ondokoa da, labur-labur: ikasle guztiek ez dituzte ikas-estilo berdinak. Eta ikas-estilo guztiei, aldez bada ere, metodologikoki erantzutea da Pikabearen asmoa. Izan ere, adituen ustez, ikasle batek zenbat eta malgutasun edo gaitasun handiagoa izan ikas-estilo bat baino gehiago erabiltzeko, orduan eta etekin handiagoa aterako dio prozesuari.

Bi atal nagusi ditu liburuak: alderdi teorikoa lehenbizikoa, eta zeharo praktikoa bigarrena.

Lehenbiziko atalean Pikabeak ikas-estiloen eremuko argibide teoriko behinenak laburbildu ditu: estiloekiko kezka nondik datorren, definizioa eta sailkapen nagusiak, ikas-estiloek helduen hezkuntzan duten lekua, eta bereziki hizkuntzen ikaskuntzarekin duten lotura.

Aipatu alderdietan sakontze aldera, Pikabeak liburua idaztean hartutako abiapuntua zehatzago deskribatu du. Keefe-k proposatutako definizioa egin du bere (Ikas-estiloak ezaugarri kognitibo, afektibo eta fisiologikoak dira. Ezaugarri horiek adierazle iraunkor samarrak dira, eta adierazten digute ikasleak ikaskuntza-egoeretan nola bizi diren, eta nola elkar eragiten eta erantzuten duten), eta horrekin bat, Honey-k eta Mumford-ek proposatutako lau ikas-estiloak (aktiboa, erreflexiboa, teorikoa eta pragmatikoa) hartu ditu oinarri.

Liburuaren bigarren atalean, aipatu ikas-estiloak hobetzeko 7 asteko iraupena duen bat ariketa-bilduma azaltzen da, ikasgelan egiteko nahiz etxerako lan gisa erabiltzeko. Denera, 72 ariketa bildu ditu Pikabeak, horietatik hogeita bat ikas-estilo aktiboa lantzeko, eta beste hamazazpina gainerakoak indartzeko.

Bildutako ariketak bereziki mintzamena lantzeko hautatu dira, eta helburu bikoitza bete nahi

• Era guztietako ikasleek eskura izatea ahoz lantzeko ariketak
• Ikasleek ahulen dituzten ikas-estiloak indartzeko aukera izatea

Egileak berak aitortzen duen moduan, ez da hau mirari-liburua, baina bai lan sakon eta serioaren emaitza oparoa, ezbairik gabe.