Didaktika orokorra

Errorea irudi txikia sortzerakoan: Ezin izan da iruditxoa gorde helburuan

Xabier Etxague irakasleak koordinatuta, EHUko Didaktika eta Eskola Antolakuntza saileko hainbat irakaslek eman dute argitara Didaktika orokorra izeneko liburua, Erein argitaletxearen Unibertsitate saila izeneko bilduman (2004).

Etxaguek sarreran aitortzen duen bezala, liburuaren izenburuak bat egiten du unibertsitate-tituluetan (Irakasle eskoletan, Gizarte Hezkuntzako diplomaturan, Pedagogia lizentziaturan...) izaten den enborrezko asignatura baten izendapenarekin. Hori horrela, agerikoa da liburuaren hartzaile nagusiak beren prestakuntzako hasierako aldian dauden irakaslegaiak direla, baina aurkibideari begiratu azkar bat ematen badiogu, laster konturatuko gara ikasgela barruko jardunean buru-belarri ari den edozein irakaslerentzat ere izango dela baliagarria. Izan ere, egunerokotasunean sortzen zaizkigun arazoak albo batera utzi gabe, liburuan jorratzen diren gaiei esker gure hezkuntza-praktikari alderdi erreflexiboago batetik begiratzeko modua izan dezakegu.

Didaktikaren oinarri epistemologikoak, irakaskuntzaren garrantzia gizabanakoaren garapenean, irakaslearen nahiz ikaslearen jarduera, kurrikuluaren kontzeptualizazioa... Ez dago dudarik egileek berrikusketa luze-zabala bezain interesgarria eskaini digutela irakatsi eta ikasteko prozesuen gainean.