Ikas-materialen izaria
| Ikas-materialak |
Ikas-materiala, esan dugun bezala, ikasleari ikasteko aukera eskaintzen dion edozein tresna izan daiteke. Bada ordea alderik, ikas-material batetik beste batera. Alde horiek azaltzeko bi zatitan banatuko dugu ikas-materiala (ikus beheko irudia): “euskarria” batetik eta “eginkizuna” bestetik.
Euskarriari begiratuta, ikas-materialak errealak (hizkuntzen ikaskuntza-irakaskuntzarako espreski sortuak izan ez direnak) ala sortuak (hizkuntza irakatsi eta ikasteko helburuarekin sortu direnak) izango dira. Azken horien artean, benetakoak eta ez-benetakoak bereizten ditugu, errealen ezaugarriekin duten antzaren arabera: benetakoak, errealak izan litezkeenak, errealen ezaugarri berberak dituzte baina ikaslearentzat espreski sortuak izan dira (adibidez, ikasleek zerbait ikasteko irakasleak idatzitako iragarki bat) eta ez-benetakoak, ikaslearentzat espreski sortuak eta errealen ezaugarriak ez dituztenak.
Eginkizunari begiratuta, berriz, erabat zuzenduak direnetatik inongo instrukziorik ematen ez dutenetarainoko (ez-zuzenduak) bide osoa aurkitzen dugu. Lehenengoetan irakasleak eginkizuna zehatz-mehatz eta pausoz-pauso azaltzen dio ikasleari eta honek markatutako bideari jarraitu behar dio bere esku inongo erabakirik hartzea geratzen ez dela; bigarrenetan, berriz, ikasleak hartzen ditu eginkizunari buruzko hainbat erabaki. Esan bezala, bi mutur dira eta tarteko guztiak ere gertatzen dira.
Ikas-material bakoitza bi parametro horien (eta beste askoren) arabera defini daiteke. Materialgilearen printzipioek eta usteek erabakiko dute ikas-materialaren izaera, definituko dute materiala, alegia.
